被喻為「飲料大王」、去年新鮮出爐嘅《福布斯》中國首富──娃哈哈董事長宗慶后今年有個新目標，就係進軍零售業，仲好有計劃咁諗住喺內地二、三線城市新開100家百貨商店。
宗慶后嘅諗法，係想喺呢啲龐大嘅百貨商店網絡入面，分銷旗下嘅娃哈哈產品。絲絲眼見大陸有咁多百貨店，佢使乜自己開店呢？點解唔好似其他飲品咁，與百貨店嘅超市合作，上架咪得囉！宗慶后就話，佢主要係想分銷自家產品時有更多話事權啫，揀喺二、三線城市就可以更容易開展業務，事關啲大城市已畀啲成熟企業佔領晒！
佢係人大代表，早前特登用咗一日一夜去整理一份議案及16份提案，內容涉及房地產、上市公司分紅、三農政策、節能減排等，真係乜都有啲，但篇幅較大嘅仍然係大眾關注嘅房價問題。
（余絲韻）