絲絲講場：大新推卡轉玩中國風
好多人申請信用卡係為咗攞迎新禮物或者貪買嘢有折頭，絲絲申請就係為咗卡上面嘅卡通公仔，唔知大新（02356）係咪睇中絲絲呢一類消費者，成日Crossover啲日本公仔。
新推雙幣信用卡
大新今次轉玩中國風，與銀聯合作推出雙幣信用卡，尋日仲搞咗個發卡儀式，布景有「囍」，嘉賓上台祝酒又被攝影師叫住，絲絲仲以為自己去咗婚禮飲宴。絲絲聽聞呢張卡有好多着數，去大陸或外遊簽卡免手續費，如果開人民幣定存，仲有1.5%嘅年利率，最緊要係任揀10家包括香港及內地的「我至愛商戶」，有10倍回贈，等絲絲拎埋政府派嗰6,000蚊，一於去消費吓先！
絲絲撞到大新銀行執董藍章華，佢話其實呢張卡喺一月已經試推，反應勁好，有成幾千張申請，今次正式推出，希望有幾萬張批出啦。
（余絲韻）