港交所喺下周一開始就會推行新嘅股市交易時段，散戶樊小姐認為，股民有更多時間落盤始終係好事，而港股交易時段可以與全球各大交易所接軌，交易時間多咗亦會令到港股成交量上升。正因為咁，樊小姐話佢喺上周已一早買定港交所（00388），博佢受惠於交易時間延長而有更好嘅業績喎。
雖然港股加時，散戶唔使好似證券業人士加時工作咁辛苦，但生活習慣改變就在所難免。
樊小姐話，為咗開市前可以做足功課，喺下周開始佢就要早一個鐘頭喺7點起身，亦會早啲落證券行霸定位做準備。
以往晏晝出去食飯，樊小姐都夠時間去等位飲吓茶，但新時段實施後，佢覺得第日與魚缸股友可以一齊飲茶嘅機會會買少見少，「我諗第時只係夠時間去茶餐廳食個快餐，之後就要急急腳返證券行等下晝開市喇。」
（余絲韻）