銀行股排住隊派成績表，尋日輪到渣打（02888），盤數靚仔唔在講，喺業績公布前一日，渣打就雷曼股票掛鈎嘅結構性票據（ELN）達成回購協議，解決咗呢件擾攘多時嘅問題，而不時喺渣打大廈現身嘅雷曼投資者，尋日猶如人間蒸發，毫無蹤影。
話說去年銀行公會主席輪到由渣打嘅人做，雷曼投資者先「衝擊」銀行公會辦公室，原先安排喺會後見記者嘅地方，都臨時改為渣打總部嘅辦公室，雷曼投資者立即帶埋Banner（橫額）趕去渣打，實行Mark到實。依家雷曼ELN一事已搞掂，尋日渣打大堂雖然仲有保安加紅繩攔住「戒備」，不過最終都安然無事。
渣打香港區總裁洪丕正（Ben）話，解決雷曼ELN事件，無論對客戶、銀行及員工都係好事。絲絲心諗，渣打最大嘅「炸彈」已經拆解，相信員工更關注今年加薪幅度，同埋派幾多花紅啦！阿Ben就話會繼續畀具競爭力嘅花紅及薪酬，喺四月自有分曉。
講起花紅，滙豐亦會喺本月底將花紅存入員工戶口，新人工將喺四月起調整。
（余絲韻）