豪宅樓價經過近幾年不斷上升，大部分已經突破高位，所以部分城中名人最近紛紛趁有利可圖賣出單位套現，地產代理老友同絲絲講，話中建電訊（00138）主席麥紹棠最近放售持有嘅大潭道20號Rosecliff 7號屋，意向價約1.38億元。剛啱向證監會攞正牌嘅對沖基金經理施家文，都有間屋喺呢度，佢大可參考吓麥生間屋嘅成交價，睇吓值唔值得放盤呢！
麥主席或有關人士持有嘅Rosecliff 7號屋面積約3,980方呎，戶外面積約1,000方呎，洋房樓高3層，設有四房，空間感十足，其中飯廳一旁更設有酒吧，而廳內亦設置影視器材。呢幢洋房今次透過第一太平戴維斯代理要約出售，截標日期為三月二十四日，有興趣就要快手，若成功賣出，呎價將逼近35,000元。
香港樓價愈嚟愈貴，豪宅價就更癲，大部分已超出九七年高位，好似麥生呢間屋為例，九七年成交價係8,525萬元，即係話依家嘅意向價比當年超出六成。
大潭道20號Rosecliff 整個屋苑只有11幢洋房，業主都係非富則貴人物，好似高盛前星級交易員、離職後創立對沖基金Azentus Capital Management嘅施家文，○九年以9,600萬元購入同屋苑一幢單號屋，當時呎價僅約24,000元。絲絲唔知佢間屋有幾大，假設同7號屋咁上下大，施家文嘅帳面利潤都好犀利，有四成幾升幅，即係賺咗四千幾萬。
（余絲韻）