市場熱線：哈動買定等開車

依家個個政府都驚死民怨沸騰，派錢就係最有效方法，中國話會提高個人稅免稅額，美國早排亦要退稅。奧巴馬同阿伯雖然成日話唔驚油價升同通脹，但市場最有效率，隔晚道指急跌168點，滬綜指微跌5點，恒指最多跌481點，但收市回升番百幾點，成交唔夠700億元，沽壓唔算大，尤其二三線股下晝好多從深切治療部抬番出嚟。

中國建築逢低可吸

鬍鬚曾回水，零售股鹹魚翻生，亦有啲股先跌後升，古勝早兩日話嘅真明麗（01868）跌到3蚊之後倒升到3.23元，絕地反彈嘅當然要數比亞迪（01211），守住30蚊之後急彈9.2%，但呢類基本因素已轉壞嘅股冇乜高追價值，當然佢嘅車減價後賣成點，管理層最清楚。

中鐵建（01186）沙特項目止血冇幾耐，又到利比亞項目賴嘢，海外工程賺埋唔夠蝕，中鐵（00390）同中交建（01800）都恐防有損失；中國建築（03311）應該唔使驚，因為海外工程係由阿媽做，老古雖然6蚊附近撈底失敗，但覺得呢隻股的確好有錢途，下次再有低位唔好錯過。

大昌行（01828）賺多成倍至14億元，但有4.5億銀係賣嘢所得，往績PE約11倍，「筆直」加新車稅對佢造成打擊，不過祖國取消買車優惠嘅影響比預期低，古勝認為呢隻股好難再有舊年咁勁，但可以炒上落。

連比亞迪都強勁反彈，唔係太水皮嘅股又跌得太殘嘅話，的確有得諗，哈爾濱動力（01133）尋日亦升5.9%，隻股由接近14蚊撻到落9蚊，跌幅達3成半，間公司冇乜問題，今個月派成績表之後PE會降到13倍左右。油價急升到接近100美金，或降低火電設備嘅需求，但核電嘅生意足以彌補。

哈動一向大上大落，由舊年下半年開始由5元多升到14元都幾誇張，今次回調到9蚊，差唔多係升幅嘅一半，有機會完成調整。一月時花旗引述內地傳媒話佢阿媽同中國一重集團重組單嘢傳暫擱置；老古睇番段新聞，只係話因人事安排待批而暫時擱置，但冇話會終止。兩間公司分別係上下游產業，一重手頭上核能設備合同嘅市佔率達40%，如果整合成功，可以同東氣（01072）、上氣（02727）喺核電市場鼎足三立，亦對哈動股價好有影響，雖然近似賭博，但哈動股價料已見底，有得博也！

money18 助你縱橫股壇

古勝又有好介紹，市場訊息千變萬化，要掌握最新市場動態及消息，看官可即上money18.on.cc查閱免費即秒股價及市場資訊；iPhone手機用戶更可透過money18 app獲取最新炒股訊息。此外，打電話聽上日行情電話熱線：27958888，更為閣下提供詳盡的股票報價資料。

古勝