升幅勁過全港豪宅
香港興業（00480）執行董事鍾心田同絲絲講，話愉景灣發展不斷擴大，但屋苑內嘅 高爾夫球車數目早定上限500部，牌照數目不得增加，成交價由最初開售8萬至9萬元，急升至現時普遍達百多萬元。由於求過於供，所以租金亦相當理想，月租已超過10,000元。
美聯物業潘慶樑話，愉景灣嘅高球車有錢亦未必買到，因為絕少有業主放賣，而以200萬元買入一部高球車嘅買家，亦因本身以3,520萬元購入海澄湖畔洋房，獲原業主順便割愛出售。其實高球車價格走勢與本港經濟起跌一向掛鈎，好似九七年高球車做價曾升至約65萬元，以依家最高價計升值約兩倍，勁過全港豪宅升幅。
（余絲韻）