永義實業（00616）最近被「狙擊」，印度裔裁縫Raja M. Daswani密密吸納永義股份，根據佢喺報章刊登嘅公告，佢已經持有永義28.07%股份，依家正考慮與一致行動者作出自願性全面收購建議，不過講明未曾接觸永義嘅董事會。絲絲尋日走訪呢位裁縫大王，佢話對於全面要約都仲係未Ready，對於其他細節就三緘其口。
永義尋日就出咗通告，話仲未開始磋商。Daswani尋日坐鎮喺舖頭，絲絲即時問佢接觸咗永義未？佢話No idea，唔係自己嘅責任。對於未來會唔會再增持、依家股價仲抵唔抵買，佢就話太敏感，唔答喇，要講嘅都喺通告講晒。不過佢就話鍾意永義資金多、物業充裕，所以先會買股。
原本經營縫紉嘅Daswani其實對紡織業都好有認識，佢喺深圳及香港都有業務，出口去全世界。佢間舖叫Raja，係帝王嘅意思，所以佢有個中文暱稱叫「大王」，聽講係佢啲裁縫改o架。
（余絲韻）