港交所（00388）行政總裁李小加尋日亦有畀面出席七大證券經紀組織聯合春茗，冇見小加總裁一排，佢好似消瘦咗，唔通佢為咗研究建立人民幣資金池而廢枕忘餐？
查實係佢勤做運動就真，日子有功自然身心健康，身材更Fit啦。話說一向喜歡踢足球嘅佢，除咗與各大金融組織踢友誼賽切磋球技，近期港交所亦有舉行足球比賽。
絲絲覺得，金融工作分秒必爭，又非常緊張，有時真係忙到食唔定時，運動除咗可以紓緩員工身心，又可增進同事之間嘅友誼，非常值得推廣。
小加總裁話交易所最少分成五大隊，員工多嘅部門好似資訊科技、結算、上市科等就會各自組成一隊，其他員工較少嘅部門就合併為聯合A隊及聯合B隊。佢日前就代表聯合B隊迎戰上市科，結果聯合B隊二比一勝出。佢遲啲又會代表港交所與王國安任會長嘅證券及期貨專業總會比賽。
講完足球，絲絲梗係想問吓佢關於人仔IPO嘅嘢，不過佢話港交所喺下周三公布業績，要賣吓關子喎！
（余絲韻）