絲絲講場:重量級春茗搭鋼台撐住

七大證券經紀組織(證券業協會、中資證券業協會、證券商協會、證券學會、證券及期貨專業總會、網上經紀協會、專業財經分析及評論家協會)尋日破天荒首次「聯合行動」,喺港交所(00388)展覽廳舉行團拜,今次創舉的確創造咗唔少歷史,好似嘉賓出席人數就高達七百、八百人,打破歷來紀錄。好彩啲嘉賓唔係集中喺同一時間出現,期間「有入有出」,不致出現逼爆港交所嘅場面。

逾140人上台 早買保險

除咗出席嘉賓人數打破紀錄外,連上台慶祝嘅人數亦高達140多人,事關7個會嘅正副主席,再加埋政府、證監會及港交所等高層代表,有百幾人實不足為奇。

一手撮合今次聯合春茗嘅證券學會會長李細燕話,由於上台人數眾多,負責租場畀佢哋嘅港交所為安全起見,要求佢搵專業建築師檢查個台,並簽名確認個台符合安全,非常謹慎。主辦單位亦有為活動買保險,以求安心。

據聞平時舉行活動,個台一般由木搭就可以,但七大證券經紀組織聯合春茗個台,就要用雙重鋼建成,確保堅固穩陣,就算有一百幾十人企上台,假設平均每人重150磅,即係可以承受近22,500磅嘅重量,都算勁喎!

講開港交所嘅展覽廳,平時會出租畀團體舉行各項與財經有關嘅活動及研討會等,但香港人嘅創意有時會叫大家感到意外。話說過去曾有人致電港交所要求喺展覽廳搞影婚紗相推廣,但由於活動可能太過商業化,最終被拒。如果絲絲他日結婚,想租展覽廳舉行婚禮,話晒絲絲與財經界有啲關係,唔知港交所會唔會考慮呢?

(余絲韻)

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率