市場熱線：中生製藥逆市突圍

今次「七國咁亂」升級，絕對唔係「黑天鵝」事件，古勝唔多識政治，但利比亞總統叫得做「狂人」，點會乖乖交出政權？又點解今次全球魚缸反應咁大？當然，攞石油供應已經大條道理，四月紐約期油好似火箭飆升到近百美金一桶，但呢類政治市都有擺平嘅時候，除非話石油措施被破壞至會影響供應。

憧憬托市一廂情願

不過，次次發生呢類外圍急跌事件，都係美股休市嘅時候，真係有冇咁好彩？執筆時標普期貨跌緊20點，歐股亦再跌，呢類市好難估，美股收市係點瞓醒覺就知，但對於美股唔使太悲觀，一句趁低吸納就扭轉跌勢屢見不鮮。A股就比較跌眼鏡，開波先升原來係假象，滬綜指跌76點，原本以為中央要「維穩」會托住股市，但只係一廂情願。

期指成交由前日嘅6萬幾張急升到尋日超過10萬張，周五就結算，呢個月係好淡通殺。油金係唯一得益者，結果尋日得油金股逆市上升，其他係一片慘綠。

地產股今日成焦點

二三線股早已跑輸大市，尋日再衰多兩錢，中國無線（02369）再跌9.5%，「博士田雞」（01698）亦卒之破底，阿里巴巴（01688）「自爆」勇氣可嘉，總之就聞者心酸。

今日係一年一度財政預算案，鬍鬚曾理應派吓糖益吓中下階層，古勝始終認為直接派錢最實際，又話驚刺激通脹，但通脹係由同胞掃貨引起，鬍鬚曾食米唔知米貴。另外，地主股會係今日焦點，政府最鍾意玩「數字遊戲」，用長線增加土地供應去遏制短線炒風，好似不倫不類。

堡獅龍（00592）同361度（01361）尋日均派中期成績表，如果簡單用全年盈利係中期兩倍計算，兩隻都係二線品牌，都係預測PE約10倍左右，睇落好似幾抵，但堡獅龍面對嘅大問題係今年舖租會狂加，而361度則係宣傳推廣加埋行政開支大升，依家孖屐氣氛唔好，睇負面因素多過正面因素。

自從祖國話會將醫保補助由每人120蚊人仔加到200蚊人仔之後，老古一直留意住藥業股，但大部分都冇料到，比較好樣嘅得神威（02877）同中國生物製藥（01177），但前者尋日亦隨大市回吐4%，得中生製藥仍可逆市上升，仲係連續7支陽燭。

肝病藥研發能力強

間公司做專科藥物，專長係心血管同肝病，好多大行都對佢前景睇好，舊年頭九個月賺多16.8%冇乜特別，但股價一枝獨秀事必有因，老古認為值得捧場。

中生製藥近排嘅最大動作係用2.4億銀向大股東收購咗兩間藥品同原料公司，申銀出過報告稱公司係肝病藥嘅龍頭，研發人員超過300人，據一項調查喺全國研發能力排第二，銷售隊伍超過4,000人，其中旗下一間比較細嘅公司北京泰德已申請喺深圳創業板上市，創業板招股PE動輒過百倍，中生製藥睇PE幾貴，但隨時禾稈冚珍珠，可以跟番轉。

戰報

經緯紡機（00350）+39%

經緯逆市展強勢，昨創新高8.4元，桃桃本月八日推介時低位6.03元，勁升逾39%，認真和味。

保利協鑫（03800）+14%

小尾上星期三吼中嘅保利協鑫，昨逆市向上，高見3.95元，較推介日低位3.46元，累升逾14%。

古勝