踏入二月，創業板轉主板活動已相當活躍。近年嚟創業板股份轉主板活動頻繁，主要原因係轉主板後可以改善企業形象外、同時增加股份流通量同容易融資，令創業板企業蠢蠢欲動。
近年環球經濟持續復甦，企業盈利表現又「愈見愈勇」，加上港交所（00388）喺政策上嘅支持同鼓勵，就有更多企業籌備轉主板。修例前創業板同主板屬兩個獨立市場，但依家兩者已經係「合二為一」，「創業板變成咗一個平台，係作為轉去主板嘅一個跳板」，一飛沖天也。
加上創業板公司好多都係中小型企業，發展到人生某一個階段，自然希望引入一啲基金或者機構投資者做策略性股東，從而令股價進一步飛升，但礙於創業板嘅身份令潛在基金股東卻步，轉往主板就可以解決呢個問題。
創業板企業近年紛紛轉投主板懷抱，其實同港交所三年前簡化企業轉板要求不無關係。港交所喺○八年修改《主板上市規則》同《創業板上市規則》後，當年轉主板企業嘅數目一下子已達到十四間。
目前企業喺創業板上市滿一年同埋符合主板上市要求（過去三年盈利達5,000萬元、上市後市值達2億元），就有資格申請轉去主板。同時，修例後企業可以慳番唔少轉板成本，除咗唔使聘請保薦人或者財務顧問之外，仲可以公告代替過往轉主板時要重新另行印招股章程嘅煩瑣嘢，創業板轉主板首次上市費更加可獲減半。
香港大學電子金融服務榮譽助理教授 徐燦傑（作者為註冊持牌人士）