自從「紅籌之父」梁伯韜入股意馬國際（00585）後，一直未有實際搞作，殊不知一係唔搞，一搞就大大鑊，近日就宣布收購咗管理及擁有包括內地知名度極高嘅《喜羊羊與灰太狼》商標及卡通人物在內嘅動漫火車集團，除咗收購，梁伯韜順道為意馬引入一班強勁股東，呢班被佢形容為「好朋友」及「長期客戶」嘅股東，包括長江生命（00775）及榮智建旗下嘅公司等。
以梁伯韜與長和系主席李嘉誠嘅關係，意馬引入「超人」做股東並唔出奇，但「超人」何以會透過長江生命入股？呢一點梁伯韜當然唔能夠代答，但佢講笑話可能與佢當年有份幫長江生命上市（上創業板）有關喎。
佢仲話當日致電李先生邀請入股，透露意馬將收購管理《喜羊羊與灰太狼》商標嘅公司時，李先生竟然話知道「喜羊羊」係乜水，連佢都大感驚訝。至於梁伯韜本身鍾意羊定係狼？見慣場面既佢就話自己兩樣都鍾意，其中愛狼係因為劇中嘅灰太狼好錫老婆喎。
余絲韻