兩岸交流日見頻繁，聽講中電信（00728）董事長王曉初喺近日到訪台灣，佢除咗拜訪電訊同業，最重要係會與當地手機生產商宏達電集團董事長王雪紅以及金仁寶集團董事長許勝雄見面，及早為中電信搶入EVDO作準備。
今年中電信為3G用戶數量作全力衝刺，又積極從CDMA2000升級到EVDO，公司諗住採購超過6,000萬部手機，而3G嘅比重仲會多過一半。
王曉初嘅寶島之行仲會見吓晶片及終端設備供應商，與佢哋討論3G、寬頻及物聯網。
至於重頭戲係見王雪紅及許勝雄。王雪紅最近與「殼王」陳國強合作收購電視廣播（00511），令更多港人認識呢位女強人，佢旗下有宏達電（HTC）及威睿，相當巴閉，HTC已貴為全球五大智能手機品牌之一，威睿又係全球主要CDMA晶片業者，王曉初同佢見面，單係講採購手機、EVDO終端設備都有排傾。
金仁寶集團業務橫跨筆記電腦、平板電腦及手機代工，加上網通設備及電訊服務，據聞王曉初好重視與金仁寶老闆許勝雄見面，梗要傾吓3G合作大計喇！
余絲韻