聯想集團（00992）主席柳傳志喺四月將滿67歲，佢近期經常被問到退休問題，大家又好關心佢心目中邊個係接班人，查實柳總曾與「股神」巴菲特交流，並倣效咗對方嘅部分經驗。柳總話會喺公司內集體討論接班人計劃，並明確定下接班人，但每隔5年會根據接班人表現作出調整策略。
柳總自○九年初復出，與聯想CEO楊元慶等國際團隊，一齊帶領聯想連續5季成為全球前五大電腦廠商中增長最快嘅廠商後，再度萌生退意。佢將退休以及搵接班人嘅問題，作出咗分兩步走嘅安排。
佢期望聯想建成一個「沒有家族的家族企業」，唔會好似中國第一代企業家咁，選擇子承父業。佢會盡快將自己從聯想當前繁重嘅事務性工作中解脫出嚟，「讓自己現在的工作至少減少一半，有時間去打高爾夫球。」
聯想係柳總嘅命根，佢至今仍然傾注咗好大精力。內地《第一財經日報》引述佢嘅說話：「遇到合適嘅企業及合適嘅價格，我哋會繼續收購。」柳總希望聯想唔單只做到「體量」更大，而且要成為受人尊敬嘅國際性企業，喺產品技術上發展得更好。若從聯想退休後，柳總第二步係會從聯想控股退休，但睇怕要等聯想控股整體完成上市後，先會行到呢一步。
余絲韻