市場熱線：雨潤大行齊唱好

短線繼續炒上落

不過，二三線股持續跑輸大市，成交得618億元，如果話資金流入嘅話，唔應該係咁嘅樣，藍籌亦主要升公用股，中石化（00386）就算加成品油價卻先升後跌，光行話上H股亦帶動唔到光控（00165），聯想（00992）批股後倒升，呢輪係好消息唔升、壞消息唔跌，內房股尋日表現亦唔係咁差，個別如中國海外（00688）繼續反彈，學古勝話齋：橫掂都係炒上落，有乜嘢唔怕博？

滬綜指則係先跌後升，皆因存款準備金率已加到麻木，依家大陸最驚嘅係茉莉花，其他都以「河蟹」為重，所以魚缸呢排反而會穩陣。

經緯紡機（00350）同中興（00763）A股都升停板，兩隻H股亦保持強勢，但A升H跌嘅例子好多，例如金風（02208）A股升逾4%，但H股就跌到新低。

老古尋日講維生素C行業提高准入條件，中國製藥（01093）果然大升，留意新聞隨時有筍嘢，但上個禮拜醫保補貼提高到200蚊人仔，醫藥股卻冇料到。祖國傳減奶粉同化妝品入口稅，照計歐舒丹（00973）得益但亦唔升，國產奶粉股則因價格優勢降低，所以跌多兩錢重。

體育股吸引力減

安踏（02020）中午派成績表好過預期有凸，一○年PE為16倍幾，但股價竟然下晝跌到4.5%，體育用品股估值大降，反而有8厘幾息嘅中動向（03818）回升到3蚊。體育用品股當旺嘅時候，廿幾倍PE都覺得超值，依家又變得冇人吼。中國無線（02369）由高位撻落33%，好有散水feel，單睇指數好似冇事發生，但重傷嘅散戶不在少數。

在下嘥咗咁多口水，都係想話呢排個市如無定向風，差唔多要學「盲拳打死老師傅」，但老古始終相信實力股嘅長線價值，雨潤食品（01068）、華創（00291）同北控（00392）都係逢低吸納分子。講起隻雨潤，好多人驚中央物價調控會冇得加價，但豬肉個市場咁大，中央想控制亦有心無力，所以來一招釜底抽薪，將食品佔CPI嘅比重調低，然後集中鬥地主。

保持穩定毛利率

雨潤由34蚊插到落最低22.4元，跌幅達34%，全靠高盛份報告至起死回生，然後滙證調高評級至增持，細摩亦維持雨潤做佢內需3大首選股之一。依家好多人對PE超過20倍嘅股避之則吉，雨潤一○年PE將降到18倍，下月有機會炒吓業績，而公司嘅盈利增長動力主要靠產能同產量上升，雨潤積極增加屠宰產能，生豬成本上升之同時，公司有條件將成本轉嫁畀消費者，相信毛利率可保持。

雖然呢排內需股普遍變內「衰」股，但唔同買衫買車，豬肉佬真係唔使憂，18倍PE已係頗吸引水平。

戰報

中興通訊（00763）+19%

中興近日靜靜起革命，昨抽上高位35.65元，較帥哥上月三十一日推介時低位29.95元，升逾19%。

天業節水（00840）+13%

天業節水尋日開快車，搶高至1.9元，較古晨上周五推介時低位1.68元，累升超過13%。

古勝