孖妹缸湖遊：財金時裝精教炒名牌股

黃德几 金利豐證券研究部董事 名牌美股可追捧

祺祺：你係證券界出名嘅時裝精，聽講你讀大學時已經買名牌西裝。

黃：我讀中四時與兩個朋友包咗蘭桂坊間Disco搞派對，為隆重其事買咗件Junior Jean Paul Gaultier恤衫。讀大學時買過其中一套最貴嘅衫就係西裝，當時多倫多ISSEY MIYAKE要撤出，貨品有二五折，但減完價都要1,600加元（現約12,000元），所以嗰時都係使老竇錢，而結果10年後仲用咗嚟做結婚嘅其中一套禮服。

高妹：我知道你鍾意Paul Smith，但貴嗰啲西裝要過萬元一套，有冇入貨貼士？

黃：買返工衫與股票一樣唔應該高追，要趁低吸納。好似秋冬嘅衫，六月已賣緊，十月開始凍已開始有Private Sale七折，當時仲碼齊款齊。我仲鍾意D&G及Prada，如果D&G有七折，我就會瘋狂買。

祺祺：Prada快將上市，本港影子股炒完好耐。若長線買美股只需畀股息稅，唔使畀資本增值稅都幾抵，又冇匯兌風險。

黃：我都有買過LVMH（喺巴黎掛牌、美國以ADR上市）及Ralph Lauren。LV顧客忠誠度高，當所有人以擁有其產品作身份象徵，其必然成功，從來唔打折嘅營銷策略可提高盈利，買入LVMH長期肯定有賺。Hermes都以限量方式推出產品，而Coach推陳出新，經常轉換產品成功提供新鮮感，都係值得留意嘅美股。時裝界受歡迎嘅牌子唔一定做到生意，Bathing Ape就係因經營不善，要用賤價賣畀I.T（00999）嘅好例子。

施俊威 敦沛金融證券業務董事 本地影子股跟炒

祺祺：有人話名錶係金融界裝身法寶之一，你點睇呀？

施：咁講會教壞小朋友喎！初入行時，我都有被前輩游說買番隻勞力士，雖然當時真係有羨慕佢哋戴名錶，但我覺得呢啲嘢唔重要，我都係照樣戴番隻普通牌子錶，用普通嘅原子筆。

高妹：你買吓買吓，依家有超過20隻名錶喎！

施：入行時見直屬上司喺雜誌睇陀飛輪睇得好着迷，只係覺得隻錶個名好得意，又唔明點解隻錶中間會有個窿，仔細睇先發覺原來價值超過100萬元！做新人嗰時見上級咁富貴，咁想要隻錶，就嘗試跟佢哋嘅路向，慢慢睇多啲相關資料。

祺祺：呢啲錶成20幾萬一隻，我真係買唔起。

施：好多日本人出國去其他亞太區地方工作，會亂使錢買名牌，財政一唔掂就會賣晒佢，好似我有隻全球限量50隻嘅江詩丹頓，喺金融海嘯之後買嘅，當時以3萬幾元買，依家值20幾萬元，就算經濟復甦我都唔會賣出去。

高妹：市傳Prada會喺香港及意大利同步上市，你覺得呢隻新股抽唔抽得過呢？

施：抽得過，市傳定價唔高。Prada亞太區銷售額去年升51%，預期內地消費持續強勁，Prada喺本港掛牌，若日後打進內地市場或增設分銷店都有利發展，相信陸續有高檔次企業跟住喺香港上市。除咗抽新股，最簡單就係買本地影子股，近期零售股股價調整，估值合理，而人民幣升值亦吸引內地人來港消費。好似利信達集團（00738）可於約3.97元吸納，上望4.42元，止蝕位3.52元；百麗國際（01880）可於約12.5元入市，目標價14元，止蝕位11.9元；另一隻消費股波司登（03998）股價已跌得低殘，可於2.2元買入，料上試3元，止蝕位定喺1.9元。

朱凱婷 電台及電視財經節目主持、前港姐 零售股睇定先買

祺祺：你幾時開始買名牌？

朱：中學時期讀女校就開始買名牌書包，依家鍾意着D&G、RED Valentino等，手袋就用Miu Miu及CHANEL多。名牌衫、手袋及高踭鞋我都鍾意買，不過最保值嘅都係手袋。

高妹：你每季會預留幾多「彈藥」掃手袋？

朱：我每逢新一季都會睇一次新貨，例如若漆皮手袋係嗰季具代表性嘅Item，我就會買，一般會花費5至6位數字。

祺祺：咁鍾意買名牌手袋，有冇買埋佢哋嘅股票呢？

朱：我主要投資港股及內地股票，不過都有透過美股基金涉獵國際高端消費品牌，但要提醒投資者，要視買美股為中長線投資。

高妹：買美股係投資名牌最直接嘅方法，但傳統嘅奢侈品基金喺金融海嘯後嘅回報平平，如果亞太區經濟可急速增長，相信可提高銷售，帶動消費板塊。

朱：不過投資者買名牌股要留意，若自己本身係該品牌的「粉絲」，可能會有情意結。想了解企業嘅前景，知道未來計劃及上市集資用途，就要睇招股書。

祺祺：Prada傳將上市，你有冇打算湊熱鬧抽呢隻新股？

朱：我可能會抽，但揸幾耐就到時先決定。至於相關影子股，內地零售股去年已錄得相當升幅，雖然近期進行調整，但二月市況仲未明朗，若想喺今年為投資組合加入零售股，可以睇定啲先，等股價開始進入上升軌後先入貨。

滙控炒業績50%散戶已入貨

業績期又到，滙控（00005）將於本月二十八日派成績表，兔年至今，滙控股價跑贏恒指，似乎有資金偷步買入炒業績。你已搶先買入滙控嗎？據今期《東方日報》網上民調截至上周六晚上6時嘅結果顯示，話已入貨嘅受訪者及話未買嘅受訪者各佔一半。

高妹、祺祺

若有料報畀高妹同祺祺或有嘢問，可電郵money.biz@opg.com.hk