市場熱線：中煤能源突破在即

上周五雖然整體表現幾好，但除內銀同內房回勇之外，其實冇乜方向，但有幾隻暴升股都幾得人驚，永義實業（00616）話有股東不斷增持，有機會觸發全面收購，但睇番公司往績，買佢真係要有番咁上下勇氣。

中聚雷天宜觀望

就快派成績表嘅股份，亦唔少偷步炒業績，好似安踏（02020）、堡獅龍（00592）、神州數碼（00861）同數碼通（00315）等，呢幾隻股斷估業績唔會差，尤其安踏依家爬過李寧（02331）同中動向（03818）做咗龍頭，佢業績好壞亦可決定同行生死，但炒業績呢樣嘢好考功夫，例如聯想（00992）同中芯（00981）上周五均見獲利回吐。另外，缸湖傳聞中聚雷天（00729）有股東擬以大折讓配股，難怪近日走勢不振，看官不妨待消息明朗化後才進場，暫宜觀望。

據《中國證券報》報道，維生素C行業會進行規範，即係提高入場門檻，淘汰落後產能，咁樣肯定對龍頭股中國製藥（01093）有利。維C行業好奇怪，到價好時一窩蜂生產，結果累鬥累搞到價格大跌，到汰弱留強之後價格再度上升，形成一個周期性循環，所以買中藥要好講timing。

老古一向鍾意煤炭股，幾隻煤股輪番推介，邊隻落後或有勢就揀邊隻，今期到中煤能源（01898），隻股由舊年十月嘅15蚊高位，最低回落到10.72元，上個禮拜4日升、1日平收，全周升5.3%，走勢明顯回穩，但相對神華（01088）同兗煤（01171）回升約一成來講，就顯得較為落後。

3隻煤炭股估值比較，中煤一○年預測PE係12.8倍，而神華同兗煤分別係14.4倍同12.1倍，中煤處於中間亦屬合理，但同兗煤過往溢價比較，現價明顯大為收窄，主要原因係神華名氣大、多長線投資者，兗煤以賣現貨煤為主，吸引短線炒家埋位，中煤反而覺得唔長唔短，但論質素，隻股一啲都唔輸蝕，亦有機會獲阿媽注入煤化工業務，短線有機會回升至較合理嘅估值。

至於長線對煤價嘅睇法，老古唔想講完又講，呢排阿拉伯國家七國咁亂，已經刺激油價回升，煤價亦會得益，而中煤兼有做煤礦裝備業務，收益更為穩定。

戰報

中興通訊（00763）+16%

中興上周五高見34.75元，較Dr. Stock於本月九日推介時的低位29.8元，累升超過16%。

昂納光通信（00877）+15%

詩詩上周三吼中隻昂納光通信，周五升至高位5.96元，較推介當日的5.17元，累升逾15%。

古勝