絲絲講場：黃德几夫婦遊埠掃貨
偷得浮生半日閒，絲絲尋日與金利豐證券研究部董事黃德几傾開偈，原來佢喺下星期就會放假，與老婆去美加玩番一個禮拜，除咗探親之外，仲會掃吓貨裝身，不過就唔會帶埋剛啱出世嘅B女出埠，B女會留喺香港畀人湊。咦，佢今次咪係大好機會追番個仔，湊成個「好」字囉！
紐約名店Outlet好時機
話說黃德几嘅太座係做採購嘅，嚟緊會出差去美加做嘢，所以計劃順便抖番一個星期，黃德几就會過埋去一齊玩。據佢講，紐約唔少名店嘅「Outlet」到時都做緊減價，係一個大好嘅掃貨機會，今次佢哋仲會順道去加拿大探親。
黃德几最近真係人逢喜事精神爽，剛啱榮升老竇，老婆Eva誕下7.5磅重嘅健康B女，佢冇特登攞大假陪老婆生仔，今次二人世界去遊埠等於補番數，希望喺外地嘅輕鬆氣氛下，佢兩公婆可以好事成雙，快快趣趣生多個啦！
余絲韻