德國證交所及紐約泛歐交易所合併嘅細節都定好晒，但合併後新公司名稱未有着落，𢱑爆頭都諗唔掂，兩所嘅高層決定喺內部社交網站搞個比賽，將改名重任交畀6,740名員工，實行集思廣益。
紐交所將由德交所取得控制權，華爾街人士希望盡最後努力，起碼兩所合併後喺新公司個名度攞番個彩，話晒紐約係國際金融中心，美國參議員舒默仲講到明話一定要以紐交所縮寫「NYSE」行先，兩所高層真係好驚順得哥情失嫂意。
有高層透露「DB/NYSE」呢個縮寫之作已不獲考慮。至今員工提議過嘅名包括籠統啲嘅「The Big Bourse」（大交易所）、「Liffe」（紐交所旗下嘅倫敦期貨及期權交易所）以及「Unibourse and Everything」（聯合交易所）。有人提議甚有惡搞成分嘅「Stocktoberfest」，「Oktoberfest」意指德國啤酒節，中文譯名豈不是「股票嘉年華」？
交易所合併潮浪接浪，再有消息話美國交易所「三哥」BATS收購歐洲最大另類交易平台Chi-X Europe快將成事。
余絲韻