絲絲講場：唐家成領跑馬拉松
渣打馬拉松喺明日就起跑，畢馬威會計師樓亞太區主席唐家成（Carlson）會與成班同事一齊參加。年屆56歲嘅Carlson仲係好Fit，依家佢出Trip都帶埋對跑鞋，務求今年可以喺一粒鐘內完成10公里賽事！
目標一粒鐘跑完10K
畢馬威一直好鼓勵員工參加渣打馬拉松，仲特登請咗好手李嘉倫做教練，為同事提供訓練。Carlson話跑馬拉松可強身健體，又可以增強團隊精神，所以一直都係公司傳統，去年畢馬威由於參與人數及籌款額同樣咁高，奪得企業挑戰盃最踴躍參與機構獎，咁今年有冇信心冧莊再攞獎？
Carlson話今年參與人數由去年嘅234人增至256人，增加10%，有啲仲係特登由廣州及深圳南下參賽，而佢自己嘅捐款就多咗25%，希望鼓勵同事踴躍參與！
會計師嘅生活非常繁忙，遇着Peak season仲分分鐘要凌晨先收得工，不過有份參賽嘅會計師就話訓練一啲都唔辛苦，查實朝早起身跑完步先返工仲醒神喎！Carlson亦深表贊同，所以自己都勤力練習，出Trip都帶埋跑鞋。
佢話自己參加咗4年，每年嘅完成時間都有進步，今年務求可以打破個人紀錄，一粒鐘內跑完10公里。佢今年仲帶埋囡囡以及第一次參賽嘅哥哥一齊落場跑，若然跑贏哥哥，仲可以贏到一頓大餐添！
下月榮休歎二人世界
Carlson喺三月就會榮休，退休之後有乜嘢計劃？佢話都係打吓Golf跑吓步囉，不過呢啲都係其次，最重要係唐太講到明會同老公一齊退休，工作咗咁多年，Carlson終於可以與太太享受二人世界喇！
余絲韻