近期股市一時向左走，一時向右走，搞到一班粉絲無所適從。喺狂牛市，港交所（00388）竟然一日弱過一日，全因面對環球交易電子化，加上成本上升，交易所合併肯定會成為大勢所趨。知道幾間主要國際交易所近日先後宣布合併交易計劃，港交所已經密切留意緊呢方面嘅發展。現階段港交所講咗冇同其他交易所或者業界參與者商討任何合併或者涉及股權嘅聯盟事宜。
睇睇港交所嘅《戰略規劃2010-2012》暫時大方向都冇改變。港交所如果啱時間或會搵科技供應商、業界參與者以至區內同國際同業搞戰略性結盟，希望加快實現各項增長業務嘅計劃。
個人覺得港交所合作對象一定要喺科技上同電子平台上配合、作出技術性嘅貢獻，仲要共同專注發展內地市場呢個重要任務。若果搵聯盟，有關計劃要有極強嘅戰略優勢同效益，仲要同港交所專注大中華市場方向一致。
合併之後嘅番邦交易所要搶攻亞洲市場亦都唔係咁易，爭取內地企業上市方面，涉及內地監管當局審批，香港係阿爺嘅子民，加上金融福地，始終都係首選，而咁多年嚟，香港喺內企上市亦都已經建立咗好強嘅流通量，唔係咁易畀其他外敵所取代，嚟香港上市企業嘅市盈率一般都高過歐美。
如果一一年中港股市互通係招徠，似乎阿爺點會「袖手旁觀」，中國人語錄──修身、齊家、治國、平天下，中港股市金鐘罩因外敵入侵而要加快「升呢」，唔係畀人打爆咗點算？
香港大學電子金融服務榮譽助理教授 徐燦傑