中石化（00386）旗下加油站喺去年嘅非油品生意勁升45%，銷售額達45億元人仔，呢條數咁勁，原來主要來自加油站嘅便利店所賣產品，當中又以酒最受歡迎，茅台自然不在話下，當然質素未係國宴用嗰啲咁高級，但有隻茅台神州都賣四、五百蚊，好快賣晒，仲好搵過賣成品油。
點解中石化會開闢到呢條財路？老友話，佢哋啲成品油成日要跟國家指導價，又驚通脹又要顧及民生，搞到周時都錄得虧損，收入唔穩定，惟有搵其他嘢賣幫補吓；公司發現旗下油站嘅便利店產品賣得好好，於是去年佢哋與各地酒商包括貴州茅台都簽咗合作協議。油站便利店當然會賣其他食品飲品，依家搞到有聲有色，銷售額大升並唔算奇。
絲絲聽到呢度有啲擔心，啲酒咁好賣，會唔會多咗醉酒駕駛搞到有交通意外㗎？老友話好多時啲人買酒係探朋友送禮用嘅，好少會一路揸車一路飲嘅。
余絲韻