絲絲講場：郭珮芳上京圓觀光夢
建行亞洲行政總裁郭珮芳（Miranda）經常要返北京與總行開會，絲絲心諗，佢成日去北京，都應該去晒所有地標，點知Miranda話上京述職十幾次，根本未試過可以留喺北京觀光。
冇法啦，Miranda出名搏殺，聽講佢次次上京都咁啱係周初至周中，開完會就急急腳返港處理公務。佢喺下周又要上京與總行討論業務方針，但今次終於撞啱喺周末，之後可以去一睹北京新地標鳥巢及水立方。
除咗呢啲高層次會議之外，絲絲仲聽聞建行亞洲已密鑼緊鼓籌劃新一年嘅新搞作，好似搞吓傳媒春茗及公益活動，嚟緊半年差不多個個月都會見到有高層代表。
建行亞洲拓展企責
Miranda話依家要吸引人才，除咗事業發展機會之外，受聘者愈嚟愈睇公司企業責任，所以會非常努力發展呢個範疇。佢哋喺上月開始與小童群益會合作搞青少年夥伴計劃，仲會做足成年，主旨係培育青少年，配合母行建行（00939）「建現在、見未來」嘅口號。
余絲韻