所謂「上有政策，下有對策」，對住一條又一條嘅調控樓市政策，多計仔嘅內地同胞都可以見招拆招。就喺前日（十六日），「天子」腳下嘅北京又出咗十五招對付樓市，其中一項規定係外地人如果要喺北京買樓，必須連續交足五年稅。絲絲聽聞呢項規定出咗後，北京戶口嘅價值再一次水漲船高，網上仲出現咗「為買房先找個北京人假結婚」嘅業務！
據絲絲了解，買家首先要搵個北京人假結婚，然後做貸款，之後再離婚，層樓就作為離婚財產分配畀買家，而嗰位北京人就收取樓價嘅百分之一作為安置費。
除咗買樓之外，避稅同樣花招百出。聽老友話，早兩日喺南京就有兩個毫不相干嘅男女，為咗想唔交轉手買賣嘅稅項，本身打算賣樓嘅男人變成「老公」，而買樓嘅女人就做咗「老婆」，可惜都呃唔到職員雙眼，好快就畀人識穿咗。
余絲韻