雖然已過咗正月十五日，但各團體嘅春茗仍陸續有來，好似下周二就輪到七大經紀組織（證券業協會、中資證券業協會、證券商協會、證券學會、證券及期貨專業總會、網上經紀協會、專業財經分析及評論家協會）首次破天荒聯合一齊喺港交所（00388）展覽廳舉行春茗。立法會議員詹培忠就大爆話，今次一手撮合七大經紀組織舉行聯合春茗嘅幕後功臣係證券學會會長李細燕。
話說過去兩年，只係五大經紀組織舉行聯合春茗，證券組織「老大哥」證券業協會及中資證券業協會都係各自搞春茗。有股壇前輩同絲絲講，話李細燕喺約兩個月前提出七大經紀組織一起團拜呢個構思，排位方面為咗以示公平，以抽籤決定，大家都覺得咁樣做好公平，同意呢個構思。絲絲問李細燕用乜嘢招數說服各個組織，佢就話係用誠意打動。
絲絲一直覺得團結就是力量，加上團拜其實對大家都係好事，嘉賓唔使走幾場，又唔會撞期，氣氛又熱鬧，聲勢都壯大啲。不過絲絲就諗，七個組織如果每個會嘅執委都上台，好容易逼爆個台，所以有關方面已初步安排只有各會正副主席及秘書上台，之後各會才輪流上台影相。
有證券業人士話，春茗聯合一起搞就得，但如果講到開會或向政府畀意見，就都係各自為政比較好啲，始終各會嘅意見及立場唔同。換言之，要各會合併絕對唔係容易嘅事。
余絲韻