市場熱線：重汽有權追落後

中國信貸生意唔憂

最弱嘅係內房股，京版國八條唔畀外地人買樓，效果立竿見影，如果香港唔畀大陸人買樓嘅話，相信樓市亦會即冧，但當然香港冇條件、有理由、冇需要咁做。內房股尋日平均跌幅約3%，中國海外（00688）再創52周新低，博反彈雖然好難掌握低位，但咁吸引嘅價錢，當賭大細博一鋪都抵。

舊年尾喺創業板上市嘅中國信貸（08207），尋日抽上9%，其實唔係乾炒咁簡單，原因係大錢莊今年個幾月已借出大部分信貸額度，中央又實施差別性存款準備金率，所以錢莊被迫收水無錢可借，中小企要周轉自然要搵「XX兄弟」，祖國叫典當行，尤其地產商更加缺水。中國信貸專係做物業抵押放出短期貸款，息口媲美「大耳窿」（有法律罅可走唔算違例），呢輪生意肯定好好。

尋日話霸王（01338）頂唔頂得住兩蚊言猶在耳，話咁快已輕易穿埋。中動向（03818）亦跌穿3蚊，往績息率超過8厘，但品牌嘅嘢一旦老化或整臭咗個名就有排醫。呢排啲內需股極為疲弱，隻「田雞博士」（01698）被溫水煮蛙，尋日亦跌到上市後新低，同招股價亦相距不遠，睇怕田雞呢種兩棲動物最終都要潛水。

不過，醫藥板塊應該值得留意，今年醫保補助金額將由每人120蚊人仔加到200蚊人仔，加嘅幅度係66.66%！咁大手筆嘅加幅冇理由唔炒啩？尋日藥股個別發展，比較省鏡嘅係神威（02877），呢隻亦比較正路。

掌握先進重卡技術

中國重汽（03808）前排單5億人仔存款凍過水事件已煙消雲散，一來有機會追番，二來5億人仔同公司市值比係濕濕碎，跟住公司嘅附屬公司濟南汽車發埋盈喜，預計舊年可賺多50%至1倍，所以重汽呢排股價亦精神番。間公司股價一向落後畀競爭對手濰柴（02338），人哋1送1紅股之後仍喺50蚊樓上，即係升咗1倍有多，重汽仍係停留7個幾。

不過，重汽同德國MAN公司簽咗合作協議，有望取得國際先進重卡的技術，對佢前景好有幫助，而MAN亦有計劃買重汽股票。重汽係做重卡車，同其他車股嘅需求好有分別，但同祖國嘅工業同基建需求關連度好大，依家公司一○年預測PE係13倍幾，稍低於濰柴，睇落係半斤八両，但重汽股價較落後，短線睇高啲。

戰報

MI能源（01555）+19%

MI能源昨日再創新高2.82元，跟古晨喺周一低位2.36元上車，足足賺超過19%，相當和味。

中聯重科（01157）+11%

小尾上周五叫趁低收集中聯重科，當日低位17.9元，昨高見19.94元，唔夠一星期就升超過11%。

古勝