上市公司商會尋日舉行春茗，雖然撞啱有其他團體都搞春茗，但仍有唔少嘉賓出席，非常熱鬧，立法會議員詹培忠都有畀面出席。喺新春去完美國拉斯維加斯充電嘅佢，精神飽滿咗，唔使問今次去賭城又有斬獲啦，佢話今次只係贏咗8萬美元，即係約六十幾萬港紙。
呢個數目對佢嚟講真係濕濕碎，事關佢每次去賭城都要搵美食，仲要食豪啲。今次佢與太太加埋親朋好友一行共14人，喺10日嘅賭城行程中竟然食咗300隻吉品鮑魚，冇講錯，真係食咗300隻吉品鮑魚。絲絲計計數，即係佢哋平均每日每人食咗超過兩隻鮑魚，仲有係頂級食府嘅靚鮑，都算誇張。除咗豪食鮑魚外，佢哋亦非常識享受，去咗10日，花咗10萬元睇表演，真係聽到都開心。
雖然喺賭城豪玩豪食，但詹培忠話自己反而輕咗10磅，佢最近又打咗BOTOX，難怪心情大好，非常有自信呢！
佢又話，新加坡呢排對香港步步進逼，加長股市交易時間兼加快交易系統，香港真係要好好加強本身競爭力迎戰，以維持國際金融中心地位，佢話長遠香港可能要考慮全面取消港股午休時間喎！
余絲韻