絲絲講場：張灼華續約證監３年
證監會行政總裁韋奕禮喺今年六月八日就Last day，政府已成立遴選委員會搵繼任人，聽聞最快喺本周就會公布遴選委員會名單，並刊登廣告正式招聘行政總裁。遴選委員會有6至7名成員，財爺例牌係委員會主席，其他成員包括財庫局局長陳家強、證監會主席方正、證監會獨立非執董及其他市場人士等。
繼任人係邊個大家仲要等吓，不過聽聞依家有好多人對呢個位有興趣，所以應該有一場龍爭虎鬥。據聞有關方面嘅如意算盤係，喺韋奕禮離開之前可以搵到繼任人選。
唐家成獲委非執董
市場盛傳嘅其中一個熱門繼任人─現任證監會副行政總裁張灼華，尋日一如所料獲政府續約3年，任期由今年三月一日至二○一四年二月二十八日；政府同時委任唐家成為證監會非執行董事，任期兩年。唐家成係會計師，亦係外匯基金諮詢委員會、財務匯報檢討委員團及強制性公積金計劃上訴委員會嘅成員，佢喺○六至○八年間曾擔任聯交所主板上市委員會主席。
余絲韻