喺全城有超多股東嘅滙控（00005），將於本月底（二十八日）公布全年業績，今次將會由新任集團主席范智廉及行政總裁歐智華首次以新Title主持，不過唔知係咪新人事新作風，由今次業績會開始，滙豐將會以視像廣播公布業績，唔再搞記者招待會，以後各位記者朋友就要坐定定喺Office「睇直播」。
與國際大行睇齊
滙豐話，轉用視像廣播係為咗確保全球各地媒體都有機會參與，唔再局限要人在當地，到時滙豐嘅管理層將會齊集倫敦，由主席、行政總裁及集團財務董事麥榮恩主持業績會，到八月公布中期業績時，管理層才會再現身香港。
咁究竟點解滙豐業績會由記招變為視像廣播呢？滙豐發言人就話，其實係要與其他國際大型銀行睇齊，摩通、大摩、高盛、花旗、美銀等大行嘅業績會已經以視像廣播形式進行，所以只係配合國際大趨勢。
絲絲認為，記者以往排住隊等拎業績報告嘅墟冚情況不復再，全場舉手問問題嘅情景都會成為集體回憶，依家演變為全球記者參加電話會議兼網上「睇直播」，唔知到時會唔會造成網絡大塞車呢？
至於另一國際大行渣打（02888）又點呢？據絲絲了解，佢哋嚟緊嘅全年業績會仍會有記招。至於滙控旗下嘅恒生（00011）亦好似話暫時照樣有記招發布業績，但最終以正式公布為準。
余絲韻