市場熱線：瑞年又到吸納時機

本來CPI係萬眾矚目，點知提早洩密已經冇晒神秘感，而且係接二連三發生，即係你同班春江鴨賭錢，點賭？雖然話通脹率係遠低過孖屐預期，但只係用咗「掩眼法」，好似阿伯強調老美通脹率得1%，但唔計能源同食品，同大陸一樣係自欺欺人。

消費股趨個別發展

無論係點，加息預期同通脹一齊降溫，少咗一項困擾大市嘅因素，金字塔國穩定番，美股同A股仲係強勢，睇落港股好消息多過壞消息，但所謂鐘擺理論，好消息出完就到壞消息，所以依家不宜大大注。

前日嘅異動板塊當中，得碼頭股仲有勢，謝瑞麟（00417）新春銷售火爆，刺激股價急升11.8%，其實中港過年都話金飾特別好賣，但六福（00590）反而下跌，其他消費股都係咁差，百盛（03368）同小肥羊（00968）均跌6.4%、匯銀家電（01280）跌5.9%、達芙妮（00210）跌4%，通脹利消費股係理論，但不能一本通書睇到老，好似祖國同胞收入上漲都惠及唔到消費股，香港打工仔薪酬升幅遠追唔上通脹就更加冇理由睇好本地零售股。

醫藥保健股有可為

不過，話消費股全部唔掂，未免一竹篙打一船人，例如祖國嘅白酒股就非常搶手，但如果見白酒股炒得高興，撲入香港上市嘅紅酒股則恐怕捉錯用神，皆因係完全唔同市場；就好似本港外國品牌奶粉賣斷市，但土產奶粉如澳優（01717）就發盈警，雅士利（01230）同環乳（01007）亦試新低。先揀行業再揀股，消費市場亦要揀行業，祖國開始面對人口老化問題，醫藥股同保健股有望跑贏大市。

古勝上月尾推介嘅瑞年（02010）就係其中一隻概念股，其後股價最高衝到6.72元，難得嘅係過咗新春送禮概念，但回軟到6蚊樓下仍有支持，古勝認為公司有長線持有價值，當然最主要睇佢開拓新產品同新銷售渠道嘅成效，大摩早前推介公司就係睇好佢發展互聯網銷售及發展方向。

全年業績應具保證

瑞年產品包括氨基酸片、涼茶、滴眼液、蛋白質片、骨質沖劑、蜂王漿含片等，做起咗個名之後，保健品市場向橫發展有排做。

在下開佢公司網頁，有份聲明話頻接獲個別人士查詢是否可以在內地投資瑞年，真係唔知是否咁受歡迎，但瑞年早前已見Capital基金增持，證明唔少人睇好。瑞年喺下月中就會派全年成績表，相信絕對唔會差，坊間統計一○年平均預測PE係17.5倍，呢個估值嗒得過。

戰報

菱控（08009）+12%

小尾於周一推介嘅菱控連日做好，尋日高見0.046元，較推介時低位0.041元升逾12%。

南海石油（00076）+13%

古晨上周五吼中嘅南海石油昨日逆市呈強，高見1.14元，較推介日低位1.01元累升近13%。

古勝