孖妹缸湖遊：股壇談情 散拖勝長跑？

銀婚蘇顯邦：持中電15年

祺祺：你上年銀婚（結婚25年）紀念，計埋拍拖嗰9年，同老伴已經互相扶持逾30載，咁你對邊隻股票一樣至死不渝？

蘇：我持有中電（00002）超過15年，因為公用股唔使費神日日睇，以前選擇唔多，我覺得中電企業管治相當好，公司透明度高，派息吸引而股價穩定。

投資個人化 忌一成不變

高妹：你對婚姻同股票投資嘅態度有乜唔同？

蘇：由朋友成為夫妻係一種緣分，我對婚姻睇法傾向穩定甚至係保守，婚約有約束力，可以承諾引導人性行為，夫妻要係人生路上並肩作戰，但投資就好個人化，依家市場資訊左右股價走勢，如一成不變就會吃虧。

祺祺：同金融業相交逾20年，你點睇散戶對股票薄情嘅即日鮮文化？

蘇： 3分鐘內都可以短炒買賣。好似去年意馬國際（00585）宣布重組，股價喺上午飆升逾50%，若喺升幅約10%追入，回報都幾和味，呢種係兩個鐘內嘅短炒。短炒要有目標，你覺得會升3成，達標就要離場。一般短炒定義為兩至三日，一個板塊熱炒幾日股價就回調，特色係股價調整深度大。市場波幅大，投資者唔可以過分激進，去年唔少家電、汽車板塊股價喺熱情過後，都回調超過50%，近期濠賭股都進行了調整。

高妹： 如果想同股票長長久久，唔想一夜情，你有冇好介紹？

蘇：中聯重科（01157）去年十二月上市，當年市場氣氛偏淡，14.98元的定價算是低廉，不過投資期只宜2年左右 ，因好多基建股上市初期都被追捧，但一年後受投標價低、邊際利潤薄等因素拖累表現。

單身黃偉康：了解最緊要

祺祺：有人話長揸股票係對企業嘅一種信任，你又信唔信得過手上嘅股票？

黃： 當資金主導股市而經濟存在隱憂，我會以短炒為主；當經濟好，市場情緒未進入亢奮狀態，可能會揸一年以上。有得揀，梗係想長線為主，但依家市況唔容許咁做。

高妹： 揀男朋友同股票一樣，梗想對方係藍籌，可以揸一世。

黃： 好多人希望男朋友他日可成為老公，穩定地派息（家用），甚至每年增加。不過，買股票同揀另一半，發覺唔啱要識止蝕（放手），最緊要唔好勉強，唔好同人比。

祺祺： 最近有對80後嘅調查話有6成受訪者都接受「一腳踏多船」，思想真係「開放」。

黃： 談戀愛最好一對一，我亦唔贊成同時持有太多股票，但一腳踏多船冇問題。諗深一層，投資趨勢與現代愛情觀都愈趨短線，投機者增加，令港股升跌周期縮短，而香港離婚率都抽升。

高妹： 結婚要先了解對方，咁買股票又點先算係起晒公司底呢？

黃：我唔建議買入上市短過兩年嘅股份，因了解唔深婚姻易出問題。我今年會將精神放喺自己嘅投資公司，投入「父愛」，等佢「長大成人」先會考慮放手，以投資超過20年為目標。

祺祺： 咁你依家享唔享受單身嘅生活？

黃：感情要睇緣分，唔可以強求。投資就唔同，今日睇啱一隻股票就可買入。

新婚鄧聲興：鍾情內銀股

高妹：你初六先結婚，新婚快樂！新婚後第一個情人節會同老婆點過呀？

鄧：今晚諗住搵間有情調嘅餐廳食飯，然後去睇場戲。

祺祺：結咗婚之後，要用多啲時間陪老婆，會少咗時間炒股？

鄧：因工作受限制，股票都係長揸為主，除非有特別時機，好似企業轉型，先會短炒。好似中資銀行股最短都揸一年半載，有啲由抽新股持有到依家差唔多有八年。

勿用情太深 謹記止蝕

祺祺：經濟周期行得好快，有啲龍頭企業逐漸被淘汰，唔係所有股都適合長揸。

鄧：我睇好中國長遠經濟增長，中資銀行對經濟擔當重要角色，股價會受帶動。以前香港經濟發展快，利好滙控（00005）及恒生（00011），中國會行番香港條舊路，另外我亦睇好騰訊（00700）。

高妹：睇嚟你一心想同股票長廂廝守，但以前有冇試過同股票拍散拖？

鄧：約13年前入行時會短炒消息股，揸一兩日就走。九七至九八年中資股好受歡迎，我都有炒國企紅籌，買過海興輪船（現稱中海發展（01138）），本來賺一倍，最後打回原形。我買股票會控制止蝕位喺15%至20%，消息股就限制喺30%至40%。投資股票要理性冷靜，唔可以有感情，否則會忘記止蝕；愛情就要投入同付出先可維繫長遠關係，短炒股份方面，我睇好I.T（00999）。

16.5%人認為港股有排捱

中國人民銀行突然於本月九日起加息，金融機構一年期存貸款基準利率各上調0.25厘。受內地持續加息的陰霾影響，你認為恒指何時才能升破去年24,988點高位？據今期《東方日報》網上民調截至上周六晚上六點嘅結果顯示，認為可於今年上半年破位嘅有56.1%，覺得下半年先升穿嘅有27.4%，剩番16.5%相信要等到明年或以後。

高妹、祺祺

若有料報畀高妹同祺祺或有嘢問，可電郵money.biz@opg.com.hk