市場熱線：中石化調整已完成

港股成個禮拜跌過千點，新春認真快「落」，散戶見跌市就買牛證博反彈，結果有百幾隻牛證被收回。港股成交稍縮到唔夠900億元，但沽空達57.7億元。依家老古策略係逢低買入實力股，好似華創（00291）、北控（00392）、恒安（01044）、雨潤（01068）都見有似樣反彈，就算輸亦起碼有得守；但內房股仍然好弱，又話就快有「京八條」出籠；強勢股則回吐，最離奇係數碼通（00315），創28.5元新高之後，倒跌至24.75元收市，高低位差近4蚊，和電（00215）亦跌6.4%。

央行向城市商業銀行實施差別存款準備金率，結果大錢莊多數升，但重農行（03618）就跌到上市後新低。聽講祖國同胞近日排長龍去做定期存款，炒股炒樓難搵食，做3個月定存有2.6厘息，雖然仍係負利率，但人行連串調息總算有效果。

今日祖國會公布外貿數據，老古發現坊間好少作出預測，可能原因係實在太難估。波羅的海乾散貨指數前排跌到接近1,000點，近日反彈到1,136點，但好多船東都要蝕本租船，就算今日數據好，買碼頭股好過買航運股。

中央亦發布再生有色金屬產業發展計劃，規定再生金屬所佔比例喺一五年提升到三、四成，兩隻相關股齊合天地（00976）同中金再生（00773）繼續升，前者再創上市後新高，間公司上市首日就跌穿招股價，然後升到幾乎未停過，正一禾稈冚珍珠。

博成品油加價

老古近期推介得最多嘅藍籌係聯通（00762）同中石化（00386），以表現當然係前者較好，但中石化表現亦唔算差，由7蚊升到8.9元，上周四低見7.88元，回調幅度剛好一半，應該已完成調整。

推薦中石化，主要仍係佢估值偏低，呢個禮拜繼續博成品油加價，其實成品油加價已多次推遲，根據調價機制原本係上月尾，但過年流流要控制通脹，所以一般估計會喺春節後，點知又遇着埃及騷亂令油價大幅波動，依家埃及局勢回穩，內地工廠復工令需求上升，加價此其時也。

中石化早前獲南韓基金未來資產調高目標價至11蚊，一○年預測PE只係9倍，藍籌股之中仍係數佢最平。依家孖屣流向係沽高估值股、買低估值股，思捷（00330）回升就係最佳例子，趁中石化股價回落到8蚊附近，係上車好機會。

戰報

中芯國際（00981）+19%

古晨上周四叫大家留意中芯，股份上周五最高升抵0.74元，較推介日低位0.62元升超過19%。

MI能源（01555）+13%

MI能源上周五創上市新高2.36元，帥哥早於本月一日已經吼實，跟佢上車走番轉，賺超過13%。

古勝