尋日絲絲同光大控股（00165）行政總裁陳爽食飯，講開佢嘅志願，陳總話佢讀嘅係法律，不過佢唔係想做律師，事關佢細路仔時一直都希望做一個法官，因為覺得法官好有威信，所有人都要聽佢講。
當佢去到讀大學時都揀咗法律，喺華東政法學院一讀讀咗七年，讀到碩士學位，但唔知係咪命運嘅安排，佢冇做法官，做咗企業「揸弗人」。
家陣冇得審人不特止，仲要成日畀人審佢啲業績，唯一同法官有少少異曲同工之妙嘅就係，佢亦都會審番屬下公司唔同部門嘅業績。
不過，我諗陳總應該未驚過，事關佢坐鎮光控後，啲業績同股價一路都節節上升，啲投行業務又畀佢搞到有聲有色咁，佢應該都搵到做法官嗰種有「威信」嘅滿足感啩。
不過陳總都付出咗唔少，好似佢個女咁，以前一直都好似佢嘅「小情人」咁樣，一日到黑都好跟佢，點不知佢忙得太緊要，後尾一個星期都返唔到屋企同家人食一餐飯，搞到依家十歲嘅囡囡淨係跟佢太太，令佢有好大嘅失落感。
余絲韻