絲絲講場：小熊維尼Vs牛魔王 美聯黃錦康扮嘢應市
好多人都知美聯（01200）高級執行董事黃錦康（Albert）係太極高手，尋日佢唔單只再露兩手，仲整咗個搞笑版太極推手——「小熊維尼」大戰「牛魔王」，家陣個股市跌到一仆一碌，好明顯係熊仔做緊世界，Albert尋日就係扮演呢個角色。
牛魔王彈開逾十呎
Albert着咗件黃色戰衣，成隻小熊維尼咁款，個角色係寓意熊市力量，佢對手係太極師弟馮君培，戴咗個牛角，扮演牛魔王角色，寓意牛市力量，絲絲見小熊輕輕一觸，牛魔王應手即飛，霎時向後飛彈逾十呎，而小熊身體及雙腳卻紋絲不動。
Albert話，買家代表牛市，沽家代表熊市，大部分時間牛熊平手。但係今年較為特別，內地屢次加息、美國經濟復甦緩慢，本港樓市政策頻頻出招之下，雖然牛市當道，但兔年不確定因素已有增加。佢仲話，現時牛熊角力持續，不知何時分出勝負。
余絲韻