期指觀瀾：跌市未完逢高可沽
即使筆者近期是傾向睇淡短期大市，手上亦揸住前日幸運hit到限價的沽倉盤，可是春節假期後短短四個交易日，日日插，仲要高低位差距接近千四點之多，的確是有點意料之外。
筆者還以為23,005可以守得一陣，殊不知昨期指開出23,069之後，一分鐘內23,000點已經失守，下試22,880水平，午市A股升幅擴大，對港股毫無幫助，期指跌穿22,905之後，跌勢更急，現貨收市前的好倉打靶盤推波助瀾，收市前期指見過22,632，二月期指最後收22,719，跌354點。
大市中期走勢相當惡劣，恒指確認跌穿23,005點，是22,392升至24,375點的0.764回吐，意味去年十二月中升浪，可能僅屬於超賣後的一次修正，24,988高位開始的跌市尚未完成。短期而言，即使大市可以守得住22,392點這個去年十二月低位，但一日唔能夠重返23,650甚至24,040樓上，都不能斷定調整已經完成。本應繼續逢高試沽，惟過去四日，千四點的急跌實在驚人，剛把淡倉平掉，決定先睇多一兩日至算，無謂周末假期仲要心掛掛。
John Mullen