管理泓富產業信託（00808）嘅泓富資產管理行政總裁徐英略，除咗擁有加拿大戶籍、講英文叻過講中文之外，仲感染咗好多加拿大人環保嘅習慣。好似尋日佢哋與同系嘅置富產業信託（00778）一齊搞新春午宴，事前就由佢「發辦」食乜嘢餸，魚翅、髮菜等影響生態、破壞環境嘅食物佢一一Say No！
除咗飲食之外，佢都將環保概念融入自己管理嘅寫字樓。佢話，為咗要慳電同埋改善旗下寫字樓嘅出租率，佢就試過由地下，逐級逐級行上頂樓，實行逐層巡，諗吓有乜方法可以慳電。為機房、電梯等加裝慳電裝置當然唔少得，佢哋仲分別投入40萬元和100萬元，為觀塘泓富廣場和紅磡都會大廈做綠化天台計劃，種花草樹木、加裝農圃，以及整風力和太陽能發電。
每逢假日或者放煙花時節，都會將天台出租畀寫字樓租戶搞Party。雖然有關嘅收入唔會好多，但唔少買咗佢哋股票嘅外國基金，同一啲日本和外國嘅租戶就好buy呢啲環保元素，間接為佢哋留住呢班客。徐英略話，舊年佢哋嘅出租率可以突破以往99.1%嘅高位，電費成本可節省8%至10%。至於同系嘅置富，主席趙國雄話，剛剛嘅聖誕節，商場營業額增加咗兩成；而今年一月至農曆新年期間，營業額增加咗一成半，睇嚟今年零售市道真係唔錯喎。
余絲韻