絲絲講場：滙豐善舉搞捐贈食物
好多統計都反映香港人對食物好浪費，食剩嘅食物都堆滿堆填區，喺過節時候最為明顯。好似農曆新年，都會預多咗食物，或者收咗好多手信，食極都食唔完。滙豐就諗咗好橋，將○五年嘅橋發揚光大。
原來佢哋喺○五年，搞咗個員工捐贈食物嘅活動，絲絲聽聞反應不知幾熱烈，所以今年滙豐就大搞，在全港十間分行設置食物捐獻箱，等市民將未開過的賀年食品、罐頭、奶粉、麥片等乾糧捐畀啲有需要人士。
高層出席揭幕儀式
佢哋為咗呢個咁有意義嘅活動，安咗個好好聽嘅名——「善心連綿轉出好運年」，滙豐亞太區行政總裁王冬勝、香港區總裁馬凱博，同埋香港區個人理財業務主管麥倩華尋日去咗旺角分行，主持呢個賀年食品捐贈活動嘅揭幕儀式。
個活動會喺今個月十五日截止，大家好快手顯愛心啦！而滙豐今年仲增設咗捐款項目，只要員工捐十八元，就為一個有需要人士提供一天嘅膳食。
余絲韻