期指觀瀾：下一站支持看23005
人行又加息四分之一厘，尋日復市的A股反應唔算激烈，滬綜指跌幅唔夠1%，跌24點，報2,774點，20日線所在的2,760點仲未失守。由於上海銀行同業拆息由近日高位8厘急插到3.5厘水平，內地銀行體系流動性恢復迅速之極，難怪A股跌幅遠比預期溫和。
港股是出奇的疲弱，早市期指掂一掂23,568全日高位後，經已無以為繼，好友完全無意攻上23,654阻力，隨後大市幾乎係「全日空」級級落，內銀股主導跌市，恒指午後愈跌愈多，最後收市報23,164點，跌320點，一月底的低位23,285點失守，下一站支持恐怕要睇23,005。
筆者按計劃，昨在23,550以限價形式開淡倉，不但遇到單日轉向，連期指上次低位23,257亦告失守，確實有點意外，短期至少要重返23,654樓上，後市才有一線生機，否則23,000點能否守住，暫時仲係言之尚早。尋日有點運氣，幾乎以全日高位做沽倉，筆者也不打算作持久戰，就以23,257作即市止賺，因為在嚴重超賣之下，大市先反撲到23,286至23,654之間整固的可能性，未可完全抹殺。
John Mullen