今日A股復市，但人行先下手為強宣布加息，不過詩詩又唔係咁悲觀，話唔定壞消息變成事實下，今日港股會掉轉頭嚟個低開高收都未定。
亞洲果業（00073）自上月中於8.2元見底後股價持續向上，昨日逆市再升3.7%，以9.74元報收。集團早前發盈喜，預告於本月底公布的中期業績，純利將大升逾一倍，主要是受惠於冬橙產量增加25%，平均售價按年升約9%，加上完成收購果香園食品後有一個月業績入帳所致。
工銀國際尋日亦出報告唱好亞果，認為除了盈喜因素外，由於集團擁有的果樹年紀及質素佔優，未來一兩年其生物資產估值有上調空間，給予買入評級，目標價11.6元。
淡馬錫現時持有亞果5.4%股權，而Wellington亦持有4.35%，最近一次增持是一月份，入貨價為9.6元，同現價相去不遠，既然有咁多大孖沙睇好，真係唔怕跟，目標11元，止蝕9元。
詩詩