絲絲講場：王冬勝擇吉日拜年
雖然好多人星期一已經開始返工，不過聽聞尋日係開工既吉日，唔知係咪咁嘅原因，滙豐亞太區行政總裁王冬勝特登揀咗尋日，親自去同班員工拜年。絲絲收到消息話王生好有心，一早就去咗旺角分行，下午再去埋中環總行，同超過500名員工派開工利是。
形象親民 客仔心情靚
王冬勝唔單只同班手足拜年，仲好親民，特登帶埋財神，走去客戶服務樓層，同啲米飯班主拜年大派利是，冧到班客鬼咁開心，話晒新正頭，等班客戶接過財神，嚟緊一年可以財運亨通。
咁滙豐話晒係大行，在○九年業績報告話，單係香港就已經有成二萬八個員工，如果王生逐間行去晒，都咪話唔少嘢。滙豐個公關都好識做，唔使老細走勻咁多間分行，於是度咗條橋，在旺角分行個大型屏幕嗰度，同其他九個分區嘅前線員工作個新式團拜。
（余絲韻）