絲絲講場：新數據中心動土隆重
港交所（00388）初五大鑼大鼓開市，尋日就趁初六好日，為興建新一代數據中心動土，主席夏佳理、行政總裁李小加必定到齊，證監會行政總裁韋奕禮都入鄉隨俗跟足儀式，齊齊切燒豬。
呢個耗資十億元嘅數據中心，坐落將軍澳工業邨，港交所打算喺明年第四季將旗下證券市場嘅主要數據中心搬入去。至於其他主要數據中心嘅搬遷計劃，包括衍生產品市場的數據中心，就要到2013年第四季至完成。
廣邀財金官員出席
數據中心個則上個月至獲批，可興建1幢5層高及1層地庫物業，樓面約29.82萬方呎。據講，數據中心原本個size冇咁大嘅，後尾改咗計劃，所以投資額都多咗。
講番動土儀式，都相當隆重，主禮嘅有財經事務及庫務局局長陳家強、夏佳理、李小加、韋奕禮，仲有幾個港交所董事添，好似郭志標、鄭慕智、陳子政、許照中和莊偉林。
（余絲韻）