有「QQ之父」之稱嘅騰訊（00700）主席馬化騰，喺○九年底以平咗當時本港獨立洋房成交價新高紀錄嘅4.8億元，買入石澳大浪灣道13號，成為首個「紅色企業家」進駐石澳，佢買咗個物業後就籌劃重建1幢超級豪宅，絲絲收到風，馬化騰向政府提建議，要求興建1幢4層高包括1層地庫嘅歐式設計大屋，大屋樓面超過1.9萬方呎。
馬化騰早前以呎價超過2.4萬元向華光船務趙世光買入上述大浪灣道地皮，根據絲絲啱啱收到嘅資料，佢嘅dream house設計相當豪華，其中樓底極高嘅大門頂部配以圓拱形設計，極具超級豪宅氣派。
整間大屋樓面超過1.9萬方呎，單單地下面積就有7,836方呎，除咗必備嘅巨型客廳和獨立大飯廳外，廚房都有兩個，其中一個屬中式廚房，至於主人套房就位於二樓，備有大型衣帽間，而從房間嘅大露台外望，可以見到大屋嘅私家游泳池。
另外，佔地廣逾14萬方呎嘅私家花園設計更見心思，並加入不少水景裝飾，其中沿私家車路設有蜿蜒嘅水景裝飾。
騰訊近年都幾大上大落，舊年比較頭頭碰着黑，個股價試過五日跌咗近兩成，馬化騰身家少咗超過50億。最打擊佢哋嘅，係網絡遊戲行業經營環境轉變，之後又有股東減持股份。
今年開始就嚟個大U Turn，成立「騰訊產業共贏基金」、收購美國網絡遊戲開發商Riot Games、又傳出同美國團購企業Groupon合作，唔怪之得個價好快上返200蚊，尋日稍為跌番落193.8元，高盛出咗報告，話最新目標價升至185元，但唔夠尋日個價高。
（余絲韻）