市場熱線：聯通唔怕揸長線

恒指尋日再跌69點，股民對美股日日升、港股日日跌已感到麻木，期指又低水94點，50日線（23,419點）危危乎，但100日線（23,316點）先係關鍵。國指反而有72點升幅，主要靠「石化雙雄」撐住，孖屣估祖國復市後好大機會加成品油價，雖然話通脹高，但唔加嘅話就會有柴油荒，所以話唔加唔得。

內房股難有運行

寶島魚缸尋日復市亦係先紅後黑，祖國魚缸今日會唔會同一命運？開紅盤為咗好意頭，但跟住就冇人會同錢鬥氣。睇內地傳媒報道，新春樓市非常慘淡，唔通新國八條真係成為壓倒駱駝的最後一根稻草？原來最有效武器都係錢莊收水，加埋限購令、未來加息幾次、同埋保障房陸續推出供應，房地產商咪話唔驚！

強勢股都開始頂唔順，QQ（00700）一跌就9蚊，保利協鑫（03800）跌8.8%，比較差嘅仍係內需同零售股，值得一提嘅係舊年「超購王」好孩子（01086）跌穿招股價兼創埋新低，變咗bad boy；好多股民一聽見內需概念就仆埋去，實質人哋係大半隻ODM股。就算係真正內需股，表現亦係水準以下，下個禮拜公布嘅CPI話到坐五望六，呢類股依然唔慌有運行。

馬幣同新台幣尋日雙雙創咗13年幾新高，加息同容許貨幣升值成為對抗通脹嘅最有效兩招，香港人就最慘，港幣冇得升、息口冇得加、通脹又最勁，「焗賭」放落股市，又被大戶當提款機，最眼冤係班高官仲將聯匯當係水泡，好似香港冇聯匯就會陸沉，但你睇新加坡嘅經濟體系其實仲細過香港，坡幣都唔使同美元掛鈎，近年嘅經濟發展有目共睹。

尋日聯通（00762）再升4.7%創新高，主要係瑞信出報告睇隻股值14.3元，該行做過調查，話智能手機用戶ARPU達每月123人仔，高過市場平均1倍，而且三分之二用戶每月開支不斷上升；聯通由於多i瘋客，所以佢嘅ARPU更超過150蚊人仔。

祖國有8億手機用戶，過年發短訊拜年都幾十億個，3G到舊年尾得4,705萬戶，同中央嘅目標差距好大，根據規劃，今年3G用戶嘅目標係1.5億戶，睇落好似太大想頭，但3G舊年先正式推廣，網絡未夠成熟，除咗小部分人貪新鮮之外，多數人會睇定啲先，所以今年3G至會踏入快速增長期。

祖國移動（00941）、聯通同中電信（00728）喺3G嘅市佔率分別係44%、30%同26%，雖然仍係祖國移動最多，但已經唔似2G咁獨大。聯通十二月嘅上客量達到128.4萬戶嘅新高，以走勢來講，假如3G今年真係上多1億戶，聯通由於基數較低，市佔率多幾個百分點，佢賺嘅錢就可以三級跳。

業務進入收成期

比較奇怪嘅係，聯通同西班牙電訊達成互買股份協議，但唔係批新股畀對方順便集資，而係各自喺孖屣掃貨，聯通股價係咁升，西電亦要買貴貨，而西電股價雖然也由上月的16.6歐元低位升到18.5歐元左右，但其實仲算幾平穩。無論係點，聯通未來幾個月有3億股買盤射住，而業務亦進入收成期，老古近月已幾次推介，一於揸到實，等荷包同公司業務一齊成長。

戰報

創科實業（00669）+12%

古晨上周二睇中隻創科，尋日逆市展強勢，高見10.7元，較推介日低位9.52元，升逾12%。

中國自動化（00569）+11%

尋日中國自動化最高升抵6.95元，較帥哥上月十七日推介時的低位6.23元，升超過11%。

古勝