今日係虎年最後半個交易日，下星期返嚟又係一個新開始，詩詩先祝大家未來一年財運亨通，得心應手。
早前獲超人入股嘅中國木業（00269），尋日急升達14%，成為市場焦點。中木上月中獲李嘉誠基金連同加拿大怡東等，以每股0.4元合共認購70億股，消息刺激股價急升至最高0.54元，之後出現調整，最低報0.41元，昨日再次發力，一舉升穿10日線，收報0.485元，相信今轉突破上次高位0.54元應無難度，目標0.6元，止蝕0.44元。
是次超人入股中木的協議，是與集團收購內蒙一條煤炭運輸收費高速公路掛鈎，故可以預期，集團未來將會轉型。而睇番近期超人的幾項入股動作，涵蓋電動車電池、太陽能和煤炭運輸公路業務，都屬於能源或新能源範疇，未來是否有進一步的部署，令人期待。順帶一提，現時中木每手股數為10萬股，入場最低消費要5萬銀，貴過滙控（00005）同唔少大價股，散戶跟進時要留意。
詩詩