聖誕節有好多朋友都會鍾意去睇燈飾，但之前就有環保組織話用燈膽唔環保，呼籲商業大廈轉用LED燈。恒生銀行（00011）就即刻響應，喺中環總行天台安裝咗全新嘅LED顯示屏，尋日仲正式亮燈，向全港市民拜年。
絲絲尋日行開中環撞到個老友，佢話恒生尋日正式轉用LED顯示屏，會有銀行名稱及標誌，聽聞轉用LED顯示屏係要進一步加強企業形象喎。絲絲就覺得，咁樣做亦都滿足到依家社會對環保嘅要求。
明日係大年初一，絲絲聽聞恒生會喺新年期間，喺LED屏幕加埋恒生歷年用開嘅財神公仔，以及「恭賀新禧」嘅祝賀說話，向全港市民拜個早年，一齊送虎迎兔。絲絲尋晚都忍唔住去咗中環睇吓新嘢，估唔到效果真係唔錯，大家可以喺拜年嗰陣，順便留意吓呢個新屏幕。
（余絲韻）