衡量一家公司嘅規模及投資價值，唔係淨係睇市值或資產值多少，品牌價值都好重要。品牌顧問公司Brand Finance調查就發現，賺得錢多嘅金融機構唔等於品牌價值高。調查顯示，美銀以約306億美元嘅品牌估值，成為全球最具價值嘅銀行品牌；緊隨其後係富國銀行，品牌估值約289億美元。至於滙控（00005）就跌落第3位，品牌估值約276億美元。
至於另一家出名嘅華爾街大行摩根大通，今年排名第5；貴為華爾街最賺錢券商嘅高盛就「同人唔同命」，今年排名就由去年嘅第7跌到第16位，或者係與高盛去年七月因涉嫌欺詐投資者而被美國證交會起訴有關，真係慘不忍睹。
值得一提嘅係，十大排名內有兩家中資銀行上榜，分別係排第8嘅工商銀行（01398）及排第10嘅建設銀行（00939）。
另方面，美國證交會文件顯示，美銀「揸Fit人」莫伊尼漢獲總值905萬美元嘅延後股權作為去年花紅，年薪就仍維持95萬美元不變。其他美銀高層亦獲得可觀嘅花紅作獎勵，美銀投資銀行部門主管蒙塔格去年更獲總值1,520萬美元花紅，包括總值1,430萬美元嘅有限制股票及90萬美元現金，比起佢上司莫伊尼漢嘅花紅仲多出68%。
（余絲韻）