明日就係大年初一，相信大家已準備好收利是，大家如果收到渣打嘅利物浦球星版利是封，就要好好珍藏，因為隨時係「絕版」利是封。事關利是封上嘅其中一位球星─有「王子」之稱嘅費蘭度托利斯已經轉會，就算渣打繼續贊助利物浦，「王子」着住利物浦波衫嘅情景都幾難再現。
唔單止係利是封，渣打有唔少宣傳都有利物浦嘅球星份，好似渣打之前搞咗個大抽獎，獎品之一就係請得獎者飛去英國睇利物浦比賽，喺港鐵站度賣晒廣告之餘，仲有大大幅「王子」嘅宣傳相。派咗嘅利是封好難收番，咁唔知啲宣傳相會唔會抽走呢？
記得喺去年記者會上，渣打集團主席莊貝思滿心歡喜咁同記者講，話今季「王子」會繼續留低効力利物浦，可惜只能維持半季。不過莊貝思又唔使太傷心，球員轉會之事常有，有傳聞話利物浦已搵到球星頂替「王子」嘅位置，相信對渣打嘅宣傳攻勢唔會有大影響。
（余絲韻）