眨吓眼農曆新年就到，唔知大家會點樣運用利是錢呢？儲起嚟慢慢「搣」，抑或捐去幫助有需要嘅人？其實仲有一個選擇，就係參考吓瑞信嘅報告，用利是錢買佢哋貼嘅「利是股」。瑞信揀咗八隻股票畀大家參考，當中包括匹克體育（01968）、創維數碼（00751）、耀萊集團（00970）、佳兆業集團（01638）及美聯集團（01200）等，仲估計未來十二個月呢批股票有三成六累計升幅。
信唔信得過，大家要自行判斷，瑞信就攞埋去年嘅成績畀大家睇，佢哋虎年推介嘅利是股表現跑贏恒指百分之三，而今年預計揀選利是股升幅就超過三成。絲絲都要學吓證監會，做吓啲溫馨提示，投資前多做功課，唔好齋聽人講，咁至係精明投資者。
早前里昂做咗一個兔年風水指數，瑞信分析話兔仔係敏捷、聰明及好識避險嘅動物，喺過去幾個兔年，除咗「八七股災」之外，港股喺其他嘅年份都係升市，所以佢哋相信今年股市都會有正面回報。
瑞信尤其睇好本港及內地嘅中小型股表現，好似匹克咁，隨着內地二、三線城市消費力逐漸增加，瑞信相信呢隻股嘅增長潛力大；而同樣受惠於內地強勁消費力嘅耀萊，近年內地人開始追求名車、名錶等奢侈品嘅利好因素，將漸漸反映喺佢哋嘅業績上。
（余絲韻）