政府喺去年十一月出招打壓樓市，但近兩個月樓市卻丁財兩旺，刮咗政府一大巴掌。依家樓市未見降溫迹象，地產代理老闆當然要趁勢再搞旺佢，佢哋喺新春將會用銀彈攻勢，實行谷行啲前線，喺新正頭多做生意，員工想攞「開單利是」就加把勁喇！
絲絲尋日喺美聯（01200）度收到一個咁振奮人心嘅消息，前線經紀只要把握市場機會，就可以有「搵銀」機會。個規則係咁嘅：喺大年初一促成住宅買賣成交嘅經紀，可獲派每宗交易1,000蚊嘅大利是；促成租務交投嘅經紀亦有500蚊利是，連埋原本應有嘅佣金，都幾和味o架。
美聯喺年初一、二都有超過100家分行營業，初三就會全線啟市；除咗上述所講嘅「開單利是」之外，初一、二提早開工嘅經紀，會獲公司派發50蚊開工利是。同系香港置業會喺初一至初三，向促成每宗買賣及租務成交嘅經紀派發800蚊大利是。
另一家大行雖然全線分行喺初一休市，但亦會向喺初一至初四期間，促成工商舖、住宅、車位買賣及租務成交嘅前線代理，派發每宗交易500蚊利是作獎賞，該公司喺初二下午起將有逾百家分行啟市，初五先至全線啟市。至於佢哋同系嘅另一家地產代理，亦會喺初一至初三向所有促成交易嘅經紀大派500蚊利是。
（余絲韻）